by Hamish Henderson

Roch the win i the clear day’s dawin

  • Blaws the clouds heilster-gowdie owre the bay
  • But there’s mair nor a roch win blawin
  • Thro the Great Glen o the warl the day
  • It’s a thocht that wad gar our rottans
  • Aa thae rogues that gang gallus an gay
  • Tak the road an seek ither loanins
  • Wi thair ill-ploys tae sport an play
  • Nae mair will our bonnie callants
  • Merch tae war whan our braggarts crousely craw
  • Nae wee weans frae pithead an clachan
  • Murn the ships sailin doun the Broomielaw
  • Broken faimilies in launs we’ve hairriet
  • Will curse ‘Scotlan the Brave’ nae mair, nae mair
  • Black an white ane-til-ither marriet
  • Mak the vile barracks o’ their maisters bare
  • Sae come aa ye at hame wi freedom
  • Never heed whit the houdies croak for Doom
  • In yer hous aa the bairns o Aidam
  • Will fin breid, barley-bree an paintit room
  • Whan Maclean meets wi’s friens in Springburn
  • Ae thae roses an geeans will turn tae blume
  • An a black laud frae yont Nyanga
  • Dings the fell gallows o the burghers doun